مشهد لطفل رضيع من غزة ..

هحكي حكاية طفل من غير حسد

الليل بعد .. والفجر من تاني إتولد

والشمس جاية بتبتسم شرق البلد

تحلم بضحكة بنت أو صحوة ولد




الشمس بعتت للخلايق كام شعاع

الطفل بص بخوف م الفزع ملتاع

ف عنيه دموع .. وف الدماغ عشش صداع

الشمس عينها رغرغت .. وضياها غصب عنها ضاع



ع الأرض بصت عنيه .. يمين هناك .. وشمال

بحلق في أمه وأبوه .. بحلق في باقي العيال

نطق الحروف وانتظر .. بس انتظاره طال

عيط كعادته إذا .. مجاوبش حد السؤال



زحف لأمه , رست .. فوق صدرها إيده

جعان وحافظ بطبعه .. للأكل مواعيده

إتعود أمه تلبي كل اللي بيريده

نزل اللبن .. والشجن .. والدم بيزيده



حس الطفل بطعم الاكل مش هوه

غلبه النعاس زحزحه .. بالعافية بالقوة

حبى بإيده وركبته .. شاف العيال جوة

نايمين بمنظر غريب .. متعودوش هوه



مفهمش .. لكن بكى .. نادى وقال بابا

ع الباب سمع صرخته .. حارس ببوابة

قرب عليه وابتسم .. والبسمة كدابة

صرخ الولد .. سكته .. مسحه بدبابة


الشمس م اليوم ده صاحية .. منمتلهاش أجفان

في القدس ولا ف غزة .. وجميع ربا لبنان

حالفة بنورها لتعمي .. عين كل ندل جبان

تقطع إيدين اللي يلمس .. شعرة ف دماغ إنسان